27. janúar 2012

Kæru foreldrar nemenda í Vættaskóla

Ég sendi ykkur hér með greinargerð um fyrstu stefnumótun fyrir Vættaskóla auk þeirrar ákvörðunar sem tekin hefur verið varðandi unglingadeild skólans.  Ég hvet ykkur til að lesa greinargerðina sem fylgir sem viðhengi í þessum pósti.  Greinargerðina verður einnig að finna á heimasíðum starfstöðvanna. 

Sú ákvörðun sem liggur fyrir er að unglingadeild skólans verður sameinuð haustið 2012 en kennsla unglinganna mun fara fram á báðum starfstöðvum, kjarnagreinar í Engi og valgreinar bæði í Borgum, Engi og Borgarholtsskóla auk samvals í Grafarvogsskólunum.  Félagsmiðstöðin verður einnig starfrækt í báðum húsum með höfuðstöðvar í Borgum.  Að sama skapi verður áfram lagt mikið upp úr öflugu starfi í 1. – 7. bekk á báðum starfstöðvum og horft verður til þeirra sérstöðu sem væntanlega skapast, sérstaklega í Borgum.  Frístundastarfið í Hvergilandi fær starfstöð inni í aðalskólabyggingunni í Borgum.

Í greinargerðinni eru tiltekin helstu rök með þeirri ákvörðun að sameina unglingadeild skólans haustið 2012.  Með því að sameina nemendur á unglingastigi gefast fleiri tækifæri til árangursríkari vinnubragða hvað varðar kennslu miðað við fjölda í nemendahópum, auknu framboði á valgreinum, öflugara félagsstarfi og faglegri eflingu kennara.  Að sama skapi eru dregnir fram þeir þættir sem huga þarf sérstaklega að, s.s. félagatengsl nemenda, umgjörð námsins, umferðaröryggi, félagsmiðstöðvarstarfið o.fl.

Þar að auki er tekið tillit til niðurstaðna úr skólaþingi nemenda í 7. – 9. bekk Vættaskóla frá 6. janúar 2012 og niðurstöðum úr foreldra- og starfsmannaskólaþingi frá 12. janúar.  Stjórnendur unnu einnig að SVÓT- greiningu fyrir skólann snemma í janúar þar sem skoðaðir voru styrkleikar, veikleikar, ógnanir og tækifæri í okkar nýja skólasamfélagi.  Þessi greinargerð er einnig byggð á athugun stjórnenda á þeirri sérstöðu sem hinn nýi skóli býr við með tilliti til nemendafjölda og nemendaspár, aðstöðu á starfstöðvum og þeim mannauði sem felst í starfsfólki skólans.

Nú í febrúar munu kennarar velja sig í faghópa um ýmis fagleg störf er lúta að innra starfi skólans fyrir næsta skólaár.  Faghópar verða um nýja starfsáætlun Vættaskóla, nýja skólanámskrá og um nánara skipulag unglingadeildar og nám yngri nemenda skólans.  Einnig verður tekin ákvörðun um aðkomu nemenda að frekari stefnumótun og aðkomu foreldra að stefnumótun í samstarfi við stjórnir foreldrafélaganna og skólaráða.

                                                                       Með von um gott samstarf,

                                                                       Jóhanna S. Vilbergsdóttir, skólastjóri

Greinargerðina má lesa hér