Lestrarátak



Þriðjudaginn 2. mars hófst lestrarátak í Engjaskóla sem mun standa í þrjár vikur. Jóhanna skólastjóri ávarpaði nemendur og talaði við þá um mikilvægi lestrar sem er í raun grunnur alls annars náms.
Í 7. M  hefur undanfarið verið æft af kappi fyrir stóru upplestrarkeppnina en hún er haldin á hverju ári í öllum 7. bekkjum á landinu. Í gær voru valdir þrír nemendur, þau Yrsa, Bjarni Þór og Andri Hrafn og keppa þau fyrir hönd bekkjarins  í Grafarvogskeppninni . Þau fengu smáupphitun fyrir keppnina og lásu upp ljóð og sögur og sýndu að þau verða verðugir fulltrúar okkar á þeim vettvangi.
Lestrarátakinu lýkur formlega föstudaginn 19. mars og verður þá uppskeruhátíð í sal skólans. Auðvitað vonum við að þessu átaki ljúki aldrei í raun. Æfingin skapar meistarann og þurfum við að lesa á hverjum degi í a.m.k. hálfa klukkustund til að okkur fari fram .  Við þurfum að æfa góða framsögn til að geta lesið fyrir aðra svo þeir hafi gagn og gaman af, lesa hátt og skýrt, túlka textann og sýna fallega framkomu.
Það er líka mikilvægt að lesa í hljóði,  sjálfum sér til ánægju. Í rauninni sjáum við oft ekki mikla framför í lestri fyrr en þeim áfanga er náð að barnið er farið að vilja lesa sjálft og sýnir áhuga og frumkvæði í lestrinum.  Við hvetjum foreldra til að lesa fyrir börnin, það eflir orðaforða þeirra og máltilfinningu og flest börn njóta þess að eiga slíka stund með foreldrum sínum.

Skólahreysti

Fimmtudaginn 25.febrúar fór fram í Íþróttahúsinu Austurbergi keppni grunnskólanema í skólahreysti. Engjaskóli sendi fjóra keppendur til leiks og stóðu þau sig af stakri prýði því þau unnu tvær greinar af fimm, sem er mjög fátítt. Mark Bargamento úr 10.bekk sigraði í upphífingum og náði hann 41 lyftu, sem er fábær árangur. Steingerður Hauksdóttir úr 8.bekk sigraði í hreystigreip/höngu og náði hún að hanga í 4 mínútur og  21 sekúndu, sem er með betri árangri frá upphafi keppninnar. Stefán Ingi Jóhannsson úr 10.bekk og Kristbjörg Eva Hreinsdóttir úr 9.bekk kepptu í hraðabraut og urðu þau framarlega í þeirri grein.
Engjaskóli varð í  5.-6.sæti með 64,5 stig aðeins tveimur stigum frá 4.sæti.